Luke 4

Satan na Yesus wadau sawaq dia walawalaiyej

1Ariya Qotei aqa Mondor a Yesus aqa jejamuq di awoonaqa a Jordan yaq dena olo pulueqnaqa Mondor na a wadau sawaq osi gilsiqa di uratonaqa bati 40 a di laqnej. Di laqnaqa Satan bosiqa Yesus a une bei atqajqa deqa marsiqa walawalaiyoqnej.

Bati deqa Yesus a iŋgi uratsiqa qurieŋ ti soqnej. A laŋa soqnej. Bati 40 di koboonaqa a mamyej. 3Onaqa Satan na minjej, “Ni Qotei aqa Ŋiriamqa meniŋ kalil endi minjrim bem bulyibqa ni uye.” 4Degsi minjnaqa Yesus na kamba minjej, “Moses a nami Qotei aqa anjam endegsi neŋgreŋyej unu, ‘Tamo naŋgi iŋgi na segi ŋambile sqasai.’”

5Onaqa Satan na Yesus olo osiqa mana goge kobaq oqsiqa goge dia Yesus tigeltsiqa sawa sawa kalil mandor kokba naŋgi na taqatejunub qaji di Yesus osoryej. 6Osoryosiqa minjej, “Sawa sawa kalil naŋgo siŋgila ti ñoro ti di ni emqai. Sawa sawa kalil di ijo. Qotei na nami ebej. Deqa e na tamo bei yqa marsiy yqai. 7Deqa ni ijo ulatamuq endia siŋga pulutosim e qa louimqa sawa sawa kalil di ni emqai.” 8Onaqa Yesus na minjej, “Moses a nami Qotei aqa anjam endegsi neŋgreŋyej unu, ‘Ino Tamo Koba Qotei a segi qa louoqnsimqa aqa sorgomq di soqne.’”

9Onaqa Satan na Yesus olo osiqa Jerusalem qureq aisiq atra tal quraq oqsiq goge dia Yesus atsiqa minjej, “Ni Qotei aqa Ŋiriamqa endena prugosim mandamq aie. 10Agi Qotei aqa anjam nami endegsib neŋgreŋyeb unu, ‘Qotei na aqa laŋ aŋgro naŋgi minjrimqa bosib ni taqatmqab.’ 11Anjam bei dego nami endegsib neŋgreŋyeb unu, ‘Laŋ aŋgro naŋgi bosib baŋ na ni soqtmibqa ino siŋga meniŋ na qalqasai.’”

12Onaqa Yesus na kamba Satan minjej, “Qotei aqa anjam bei dego endegsib neŋgreŋyeb unu, ‘Ni ino Tamo Koba Qotei aqa siŋgila unqa osimqa ni na kumbra bei laŋa yaim. A ni aqaryaimqas kio sai kio di unqa osimqa kumbra bei laŋa yaim.’”

13Satan a kumbra kalil dena Yesus uneq waiyqa yonaq ugeiyonaqa a uratosiq ulaŋej. Bunuqna a na olo Yesus walawalaiyqa marsiqa tariŋosiq soqnej.

Yesus a Galili sawaq dia aqa wau utru atej

14Qotei aqa Mondor aqa siŋgila Yesus aqaq di sonaqa deqa a olo puluosiqa Galili sawaq aiej. Aisiq di sonaqa naŋgi a qa mare mare laqnabqa tamo uŋgasari kalil naŋgi quekriteb. 15Onaqa a bati gaigai Juda naŋgo Qotei tal miligiq giloqnsiqa tamo uŋgasari naŋgi Qotei aqa anjam minjreqnaqa naŋgi quoqnsib aqa ñam soqtoqneb.

Nasaret qure qaji tamo uŋgasari naŋgi Yesus aqa anjam qunabqa tulaŋ minjiŋ oqetnjrej

16Onaqa Yesus a dena walwelosiq Nasaret qureq aiej. Di aqa segi qure utru. A dia boleej. Aisiq dia aqa kumbra gaigai yoqnej qaji di dauryosiqa yori bationaqa Juda naŋgo Qotei tal miligiq gilsiqa Qotei aqa anjam sisiyqa osiq tigelej. 17Onaqa buk Baibel yonabqa a na waqtosiqa Qotei aqa medabu o tamo Aisaia aqa anjam nami neŋgreŋyej qaji mutu bei itosiq endegsi sisiyej, 18“Tamo Koba Qotei na e giltbej deqa aqa Mondor ijoq di unu. A na e giltbosiqa endegsi merbej, ‘Ni na tamo uge uge naŋgi ijo anjam bole plaltosim minjroqne.’ Agi Qotei na e qariŋbonaq mandamq aiem deqa e na tamo uŋgasari naŋgo segi une na siŋgila na ojejunu qaji naŋgi Qotei aqa anjam bole minjroqnitqa naŋgo une uratoqnqab. E na tamo ŋam qandimo unub qaji naŋgi boletnjroqnitqa naŋgi olo ŋamdamu poinjroqnqas. Tamo naŋgi naŋgo jeu tamo na ugeugeinjreqnub qaji naŋgi aqaryainjroqnitqa naŋgo gulube kobooqnqas. 19Tamo Koba Qotei na aqa segi tamo uŋgasari naŋgi eleŋqajqa bati agi brantqo. E anjam di mare mare laqajqa deqa Qotei na e qariŋbonaq mandamq aiem.”

20Yesus a anjam degsi sisiyosiq koboonaqa buk Baibel kabutosiqa Qotei tal taqato tamo yosiq a olo awoej. Onaqa tamo uŋgasari kalil Qotei tal miligiq di soqneb qaji naŋgi Yesus koqyesoqneb.

21Onaqa Yesus na naŋgi minjrej, “Qotei aqa anjam e endego sisiyonum niŋgi quonub qaji di aqa damu agi bini brantqo.” 22Degsi minjrnaqa naŋgi kalil aqa anjam di qusibqa naŋgi areboleboleinjrnaqa mareb, “Yesus aqa anjam di bolequja.” Naŋgi degsi marsibqa olo areqalo kobaiyoqnsib maroqneb, “Yesus a Josep aqa ŋiri. Deqa a powo qabe na osiqa anjam bole endeqaji palontosiq mergeqnu?”

23Onaqa Yesus na minjrej, “Niŋgi yawo anjam endegsib merbqab kio, ‘O ma gereiyo tamo, ni ino segi jejamu gereiye.’ Osib niŋgi endegsib merbqab, ‘Kaperneam qureq dia ni ino siŋgila babteqnamqa tamo naŋgi unoqneb. Iga degsim queqnum. Siŋgila dego kere olo ino segi qure utruq endia babt. Yimqa iga unqom.’” 24Osiqa Yesus a olo anjam endegsi minjrej, “Niŋgi quiye. E bole merŋgwai. Qotei aqa medabu o qaji tamo bei aqa segi qure utruq gilsim anjam minjroqnqas di naŋgi aqa anjam quetqa asginjrqas. Deqa a ñam saiqoji sqas. 25E bole merŋgwai. Qotei aqa medabu o qaji tamo Elaija aqa bati qa laŋ geteŋesonaqa wausau qalub bai 6-pela gilsiq awa bosaioqnej. Deqa sawa sawa kalilq dia naŋgi mam koba eb. Bati deqa Israel sawaq dia uŋa qobul gargekoba soqneb. 26Sonabqa Qotei na Elaija naŋgoq qariŋyosai. A na Elaija qariŋyonaqa Saidon sawaq gilsiq Sarefat qureq dia uŋa qobul bei aqaq di segi brantosiq aqaryaiyej. 27Qotei aqa medabu o qaji tamo Elisa aqa bati qa Israel sawaq dia lepra tamo gargekoba soqneb. Ariya Elisa a naŋgi boletnjrosai. A Siria sawaq gilsiqa dia lepra tamo bei aqa ñam Naman sonaqa a segi qujai boletej.”

28Yesus a na tamo uŋgasari Qotei tal miligiq di soqneb qaji naŋgi anjam degsi minjrnaqa naŋgi kalil qusibqa minjiŋ ani oqetnjrnaqa tigelosib Yesus ojeb. Yesus ojsib tututosib qure qalaq osi gileb. Naŋgo qure mana goge di soqnej. Deqa naŋgi Yesus mana goge dena waiyqa marsib osi gilnabqa a naŋgo ambleq na loumosiq ulaŋej.

Yesus a na tamo bei aqaq dena mondor uge wiyetej

31Ariya Yesus a Galili sawa naŋgo qure bei aqa ñam Kaperneam deq gilej. Gilsiq di sosiqa yori batieqnaqa tamo uŋgasari naŋgi koroinjroqnsiqa Qotei aqa anjam plaltosiq minjroqnej. 32Yesus aqa anjam maroqnej di siŋgila ti. A segi anjam aqa Abu. Deqa tamo uŋgasari kalil naŋgi aqa anjam quoqnsib tulaŋ prugeleŋoqneb.

33Yori bati bei tamo bei mondor uge ti so qaji a Qotei tal miligiq di soqnej. Deqa a tulaŋ koba leleŋosiqa Yesus minjej, 34“O Yesus Nasaret qaji tamo, ni iga kiergwajqa bonum? Ni iga padaltgwa bonum e? E ni qalie. Ni Qotei aqa segi Ŋiri bolequja. Ino jejamuq di une bei saiqoji.”

35Mondor uge dena Yesus degsi minjnaqa Yesus a siŋgila na ŋiriŋtosiq minjej, “Ni medabu getentsim tamo di uratosim ni ulaŋ.” Onaqa mondor uge dena tamo di uratqa osiqa tamo uŋgasari naŋgo ambleq dia tamo di waiyonaq mandamq di ŋeiesonaqa uratosiq ulaŋej. Tamo di aqa jejamu yala ugetosai. A bole soqnej. 36Onaqa tamo uŋgasari kalil naŋgi Yesus aqa kumbra di unsibqa naŋgi tulaŋ koba prugeleŋosib segi segi maroqneb, “Yesus a anjam bunuj mareqnu. Aqa anjam bunuj di siŋgila ti mareqnu. Agi a na mondor uge naŋgi anjam minjreqnaqa naŋgi aqa anjam dauryosib jaraieqnub.” 37Naŋgi degsi marsibqa jaraiosib sawa sawa kalilq dia Yesus aqa kumbra deqa mare mare laqnab tamo uŋgasari kalil naŋgi quekriteb.

Yesus na Pita aqa mimibe boletej

38Onaqa Yesus a tigelosiqa Qotei tal uratosiq Saimon aqa tal gogetej. Tal gogetosiqa Saimon aqa mimibe makobaiyonaqa jejamu kaŋkaŋyonaq unej. Deqa Yesus aqa aŋgro naŋgi na minjeb, “Ni a boletime.” 39Onaqa Yesus a gilsiq uŋa maiyej qaji aqa areq di tigelosiqa anjam segi minjnaqa aqa jejamu kaŋkaŋ di koboej. Onaqa uŋa a tigelosiqa naŋgi iŋgi goietnjrej.

Yesus na tamo uŋgasari gargekoba naŋgi boletnjrej

40Seŋ aiqa laqnaqa tamo uŋgasari ma utru segi segi so qaji naŋgo was naŋgi na joqsib Yesus aqa areq osi beleŋoqneb. Osi beleŋeqnabqa Yesus na aqa baŋ naŋgo segi segi gateq di ateqnaqa naŋgo ma koboeqnaqa naŋgi jaraioqneb. 41Mondor uge gargekoba dego Yesus na winjreqnaqa naŋgi na tamo uŋgasari naŋgi uratnjroqnsib jaraioqneb. Jaraioqnsib tulaŋ koba leleŋoqnsib Yesus minjoqneb, “Ni Qotei aqa Ŋiri.” Yeqnabqa Yesus a siŋgila na minjroqnej, “Niŋgi ijo ñam ubtsib maraib.” Degsi saidnjroqnej. Di kiyaqa? Naŋgi qalie, Yesus a Kristus deqa.

Yesus a qure qureq giloqnsiqa Qotei aqa anjam plaltosiq minjroqnej

42Onaqa nobqolo ambru Yesus a na naŋgi alelnjrsiqa qure di uratosiq wadau sawaq gilej. Gilsiq di sonaqa tamo uŋgasari naŋgi a qa ŋamosib gilsib itosib minjeb, “Ni iga uratgaim.” 43Onaqa Yesus na minjrej, “E qure bei bei naŋgoq dego giloqnsiyqa Qotei aqa anjam bole endegsi minjroqnqai, ‘Niŋgi are bulyibqa Qotei a nuŋgo Mandor Koba sosim niŋgi taqatŋgwas.’ Degsi minjroqnqai. Qotei a deqa e qariŋbonaq mandamq aiem.” 44Yesus a naŋgi degsi minjrsiqa naŋgi uratnjrsiq gilsiq Judia sawaq dia walweloqnsiqa Juda naŋgo Qotei tal miligiq giloqnsiqa tamo uŋgasari naŋgi Qotei aqa anjam palontosiq minjroqnej.